الدكاترة و الاعتصام

أعضاء هيئة التدريس بجامعة المنصورة نظموا اعتصاما أمام المباني الادارية البارحة الأحد الموافق 23-3-2008 وكان ذلك حدثا هو الأول من نوعة في حياتي الجامعية و يعتبر تحريكا للمياه الراكده و للأسف لم تسنح لي الفرصة لمشاهدة ذلك الحدث وانهم يقولون أن هذه مقدمة قد يتبعها اعتصامات لفترة أطول أو حتى الامتناع عن تصحيح أوراق الامتحانات .
وقد ذكر في الاعلان الذي تم تعليقه على جدران الكلية أنهم يطالبون برفع الأجور و أن أعضاء هيئة التدريس بالجامعة من حقهم أن يكون لهم كادر جديد

من الناحية الأخرى ثلاثة أرباع الطلبة كانوا صايعين في طرقات الكلية و بيهيصوا ولما حد يسأل على محاضرة يقولو في اعتصام النهارده يا برنس وكانوا هايصين للغاية وده ما يمنعش ان في أساتذة ألقوا محاضراتهم وكأن شيئا لم يكن

رتوش على الرموش

يا ابتسامة ليه بتفارقيني
وانا وحدي محتاج من يواسيني
تسيبيني للآهات
و لحنيني
لابتسامتك
تملا عيني
و تراضيني
و أغمض جفوني يمكن
النوم ياخدني
يوديني
عالم تاني
والنور يصحيني
وانت لسه جنبي
يا ابتسامتي

ده كان ردي على آخر بوست كتبه مصطفى- مش فاهم حاجة - وحبيت انه يكون موجود في المدونة تبعي

---------------------------------------

غبت فترة وقعدت فيها مع نفسي كتير وياريته ما حصل أنا كل يوم وأنا رايح أنام أفكر وأشوف مين هو الصاحب مين هو السر و الراحة و مش لاقي في ناس كنت مفكرهم كده بس الأيام بتكسفني وتبينلي اني حمار جر و مش فاهم الدنيا ماشية ازاي فوسط 300 واحد السنة دي و 230 واحد السنة اللي قبلها و 50 السنة اللي قبلها مالقيتش ضالتي المنشودة . كلمة أنتيم مش لاقيها في قاموسي أنا حاسس اني عبارة عن عاصفة معارف لو دخلت في مكان ما أعرفش فيه جنس مخلوق ما يعديش يومين الا و أكون عرفت اللي فيه بس يا خساره مفيش واحد تقدر تقعد معا ساعة صفا ولا حتى تلت ساعة صفا . كل ما ألاقي واحد و أقول هو ألاقيه عنده صاحبه الأنتيم اللي بييجي معاه و يروح و أنا مجرد راس زياده بيبتسملي لزوم اللباقة والمعرفة مش أكتر . لحد ما خلاص فاض بيا وبقيت بخبي راسي في الرمل و أشغل نفسي بالشغل و الدراسة عشان ما أروحش في أول موجة كآبة دا أنا حتى ما بعرفش أكتئب أول ما أشوف حد أعرفة لازم أبتسمله و أضحك و أهزر طيب فين اللي هيشوفني على حقيقتي فين اللي هقعد معاه و أقوله أنا حزين وعاز حل . فينه اللي يحكيلي و يفضفضلي بحاجة ما بيحكيهاش لحد مش يحكيلي و آخد في نفسي مقلب و يطلع بيحكي لعشره غيري. هل ده مطلب صعب ؟؟ هل أنا سئ لدرجة ان مافيش حد يبقى صاحبي..؟ من يدري؟