Saturday, September 24, 2011

ولوو

يبدو هذا العنوان مكرراً مترباً بششكل لا يصدق ولكن .. ولو
البوست اللي فات كان هزة لا تصدق لكياني لأن نفسي تسللت من خلفي و فعلت ما لا أقبل و لا يُقبَل .. و لله الحمد عبرت كزوبعة في فنجان كما كنت أقول لنفسي ..

أرجو أن أصبح أقوى في المستقبل، يقف بيني و بين هذا الهدف إرادة ضعيفة فحت .. يبدو أني لا يمكن أن أترك الحبل لنفسي على الغارب و أحمل نفسي على فعل ما أريد .. كمن يحمل شكارة أسمنت و يقبض بأصابعه على السطح الخارجي الأملس و يتحمل حرارة الأسمنت النافذة من غلاف الشكارة .. و ينقل خطواته بكل الثقل الموجود في الدنيا ليصل للمكان المطلو و يفلتها لتسقط كالحجر .. هكذا فقط سيمكنني أن أحقق ما أصبو إليه

كنت أسخر من المهازل التي تحدث عندما يسرق أحدهم كابل الهاتف الموصل لقرية ريفية متسبباً في تعطل الهواتف لفترة لا بأس بها .. و إذ فجأةً أصحو صباحا لأجد النت مفصول و أفاجأ بأن الكابل اتسرق .. نعم؟؟ اتسرق من عندنا .... ( مصدر الدهشة و الذهول و الفكوك المتدليه أننا في قلب الحضارة .. يعتبر الحي منطقتنا منطقة حضارية فيلات و شجر و شوارع 10 متر ) .. خلاصة القول .. التليفون الأرضي عطلان و النت عطلان و لاعزاء لمسلسل الكبير قوي اللي كنت بنزله .. بح .. كان في .. و خلص

العمل .. العمل .. العمل ... كنت متضايق قوي و أنا قاعد في البيت مبشتغلش .. دلوقتي عرفت اني كنت بتبطر عالنعمة .. ولو

أسبوع و تبتدي آخر سنة في كلية هلوسة .. توب علينا يا رب هون علينا يا رب ... ولو

..................
صيدلانية مفحوته
أشكرك على اهتمامك
بس يبدو اني فقري .. بعد ما قريت ردك و قررت أكتب .. النت فصل .. قصدي الكابل اتسرق
whatever !!

4 comments:

OldCatLady said...

من الواضح إن موضوع قطع النت ده أشبه بالإنفلونزا اللى دايرة على مواطنى مصر

آخر سنة عندك و عندى أنا كمان

متأكدة إنى ما عنديش حل تانى غير إنى أكمل اللى بدأته بشجاعة و مرجلة

أفتكر إنك انت كمان واقف على نفس العتبة

سلامات كتير

max.adams said...

مش متأكد اني فهمت عليكي زي ما بيقولوا بس التكرار يعلم الشطار

هقراه مرتين كمان يمكن أفهم
:P

OldCatLady said...

:D

كنت أقصد آخر سنة فى الكلية....و بالرغم من إنى مش طايقاها بس عايزاها تخلص بشكل أرضى عنه....و عندى إعتقاد إنك كمان ممكن يكون عندك نفس الخاطر

حلو ده كده ؟؟
:P

max.adams said...

اها .. وصلت يبقى الكلام كله على بعير واحده .. ماشي

أساسي طبعاً عايز أخلص ، بس أنا طايقها لأسباب .. أني بعيش دور أكبر دفعة في الكلية و الناس بتقول لنا كمان كام شهر هتبقى مهندس و بتاع
فده في حد ذاته يضفي جو من التشويق على العملية ككل .. و نخلص بقى و أنطلق لتحقيق خطتي ان شاء الله

ربنا يوفقك و يعينك على البايو كيمستري اللتي ابتليتم بها