Saturday, August 6, 2011

شايف اللي انا شايفه

الموضوع صعب .. البعد صعب و القرب أصعب

كتاباتي بتتحول بعد فترة التخمر الى بخار يتصاعد على هيئة سحب رمادية داكنة تعرف بمذاقها المتنوع و تسمى أحلام اليقظة .. الفكرة لما ما تتكتبش تتبخر زي ماتكون كحول 100% و استنشق يابو الفناكيش و اعمل دماغ ، يمكن ده سبب اني لما بتأخر عن الكتابة .. بيبقى القطر فات .. و أضطر استنى المعاد الجاي

لما أشوف حاجه محدش شايفها .. و مش عايز حد يعرف أنا شايف ايه ، ببقى حرفياً مستخبي من نفسي .. و أي حاجه تحصل في الدائرة دي بفسرها على ضوء اللي انا شايفه .. المشكلة انه ما ينفعش أشوف ده .. ما ينفعش .. لا مكانه و لا وقته ، ولما أغمض بالعافية ببقى شايف برضو اللي المفروض ما أشوفوش .. المشكلة اني بشوفه أوضح و ماببقاش شايف غيره يا ترى لو غمضت لفترة كافية هنسى اللي شفته ؟ شكلها مش جايبه شط خالص

لسه في متغيرات كتير عايزة تتحسب عشان الموضوع يبان له سكه و البوصلة تشتغل ، و لما البوصلة تشتغل ما أعرفش البوابات اللي في آخر النفق نظامها ايه .. ناوية تفتح ولا هارجع صفر اليدين
ﻷ و ايه بوابات تُهَم تسد عين الشمس

و بعد كل ده الصندوق المطلوب ما أعرفش بتاعي ولا ﻷ

و حتى لو كان الصندوق ليا ، و بشكلٍ ما بقدرة قادر لقيت مفتاحه ... أنا عارف اللي جواه و نصه ما ينفعنيش و ما ينفعش آخد حبه و أرمي الباقي .. ده مقاولة الصندوق باللي فيه .. بالسليم و الكسر و مفيش مرتجع

يادي الحوسه .. ايه ده كله .. و أنا عليا من ده بايه
و قال ايه .. أنا اللي مفكر نفسي مفتح و مياكلش معايا طلعت دلو

5 comments:

OldCatLady said...

هتشوف اللى المفروض ما تشوفوش و تغمض؟؟....مينفعش

لو فهمته و طلع زى ما شفته....يبقى ماعادش ينفع فيها تغميض....هيفضل اللى شفته ده عايش معاك كتيــــر لحد ما يبطل يبقى لسه متشاف جديد....أقصد يعنى مع الوقت المعلومة بتقدم بس الخبرة اللى بتاخدها هناك فى دماغك

حتى و إن كانت الخبرة منيلة بنيلة....الشطارة فى إنها متروحش من بالك عشان أكيد هيجيلها يوم و تفيدك

المشكلة إن مش الصندوق لوحده اللى مقاولة....عيشتك من أول ما إتولدت مقاولة....و يا إما تجيب عمال رجالة يقوموا البيت على حيله يا إما تجيب عمال نص كم يشطبولك البيت تشطيب أى كلام

مش عارفة كلامى مقنع و لا لأ....بس لازم يبقا عندك جوه نفسك كده حتة قوية حبتين...يوم ما تتخنق من الدنيا باللى فيها تروح تقعد معاها عشان تقويك على اللى جاى

ربك يسترها
:)
سلامات يا أدهم

max.adams said...

شوفي هو الموضوع كله من أوله لآخره كنايات و توريات .. و زي ماقلت أنا بستخبى من نفسي

و الصندوق ده مش حاجه محسوسة ، مش حدث مضى و انتهى ده حاجه معنوية بحته ممكن نبص احنا الاتنين على نفس الحاجه في نفس الوقت و أنا أشوف اللي أقصده و انتي تشوفي اللي كل الناس شايفاه

و طبعا ما ينفعنيش شغل الطلسأه .. أنا مهندس مدني ( فتك ) ولا هيبقى باب النجار مخلع

بالتأكيد الحته القوية موجوده و لله الحمد ، و ده اللي خلاني أشوف نفسي من بعيد و أكتشف الموقف اللي أنا فيه و قدرت و لله الحمد أقيم الموقف و آخد خطوات تحطني في الخانة السليمة ، و بعد كده قدرت أوصف الموقف بالشكل ده

آمين يا رب

تسلمي

يا مراكبي said...

خلاص اتعلم بقى ان أول ما تجيلك أي فكرة .. اكتب نوت عنها على الموبايل على طول .. وبعد كده بعدين هترجع تقراها وتفتكرها وتكتب عنها

OldCatLady said...

توقف عن كسلك و اكتب شيئا

لو سمحت يعنى

max.adams said...

اه
عفواً .. انشغلت كثيرا بنمط الحياة المضغوطة .. أعدك بالجديد

......
thank you for caring about a noop like me